|
|
@Getrucket zu Rom durch Johann besicken vnd Martinú amsterdam:
in dem iar als man zalt - M - ccccc - zu der zyt des pabst Alexanders des - vi - Jn sinê achten iar -@Hie nach volget die antwort die gehebt hat sant
Brigitta vor dem pild des crucifixes als sie bettet in der kirchê zu sant Paul -
BEr ein gantz iar dise gebett andechtigelich spricht von dem
geschecht werdê xv selen auß dem fegefeuer erloeßet
vnd auß seinem geschlecht werden - xv - sunder bekeret -
vnd - xv - gerecht auß seinem geschlecht werden in einem gutten
standt bestetiget -
vnd er erwirbt darumb die ersten staffel der volkûmenheit vnd
erkentnus - auch ware rew seiner sund
Es hat auch gesprochê das pild des crucifixes wirdt yemât dise
gebett andechtigelich verbringê dem wil ich geb meinê allerheilligisten leichnam
funffzehen tag vor seinem ende dar durch er erlediget wirdt von seinem ewigen hunger -
Auch wil ich in trencken mit meinem alleredelsten pluet das er nit
durst habe ewigelich -
Auch wil ich fuer in setzen das zaychen meines vberwintlichê
creutzes zu hilfe wider seiner feinde anfechtung -
Auch wil ich vor seynem ende komen mit meiner erweltê muter vñ
sein sele guetlichê auffnemê - vñ die fuerê zu dê ewigê frewdê
vñ wañ ich sie da hin bracht hab wil ich ir schencken einê
besundern trunck vô dem brunnen meiner gotheit - das ich den andern nit thun die dieses
gebett nit verbracht habê -
Es ist auch zu wissen so ein mensch dreysig iar todtsundê gewesen
wer vnd dises gebett andechtigelich spricht dê wil got alle sein sund vergebê -
vber das beschutzet er in vor boser anfechtung
vnd behuet im sein funff sinne
vnd erloset in vô dem gehen todt -
vñ erloeset in von der ewigen pein -
Jtem der herre Jesus wird im außtulgen alle sein sunde die er ye
verbracht hat von kintheit her bis auff dise zeyt -
Er wurdt auch durch die gnade gottes besser dañ er vor gewesen ist
vnd was er von dê herren Jhesu oder der heiligen iunckfrawen Maria
bitten wirdt das wurdt er erlangen -
Jtem der herre Jesus wil im helffen das er zu neme in guttê
tugenten vnd guttem Leben -
Auch wil er in behalten vnd bestetten in einem gutten stâdt -
Auch ob er alle sein tag gelebt hett nach seinem eygen willen vnd
solt als morgen sterben dem wirdt sein leben gestrecket -
Jtem so offt ein mêsch die gebet andechtigelich spricht so hat er -
xl - tag ablas -
vnd dar vber ist er sicher das er zugefueget wurdt dem aller
hoechstê choer der engel -
Und so yemant dise gebett eynen andern lernet sein frewd vñ
verdienstnus wirdt nymmermere abnemen sunder sie wird bleiben ewigelich -
@wo dise gebett sein oder gesprochen werden do ist got mit seinen gnaden gegenwertig vnd beschutzet in als er hat beschutzet sant Paul vor der dieffe des mers do die schiff zerprachê
Herre Jesu criste ewige seligkeit dê die dich lieb haben - du bist ein
frolockung vber treffen alle frewd vñ alle begier du bist ein heil vnd liebhaber der
buessendê sunder - du hast bezeiget deinen wollust zu sein bey den kinden der menschen -
vmb des menschen willen bist du mensch wordê an dem ende der zeit - Gedenck guetiger Jesu
alles vor betrachtens vñ ynnerstê iamers dê du vô anfang deiner empfahung in
menschlicher natur gelittê hast - vñallermaist do sich zu genehnet hat die zeit deines
allerheilwertigsten leydens in deinem gotlichen hertzen die von anfang vorgeordnet was.
Gedêck auch der trawrigkeit vñ bitterkeit die du in deiner sele dich selbs zewgende
erlitten hast - vnd do du an dem letzten abent essen deinen iungern deinê heilligê
leichnam vnd pluet gegebê hast ir fueß gewaschen vñ sie lieplich troestê in dein
kunftigs leyden vorgesagt hast - Gedenck auch der zitterten angst vnd schmertzen die du in
deinem zarten leib vor dê leyden deines creutzs getragê hast do du nach deinê
driueltigen gebett pluetigen schwaiß schwitzest - vô deinem eygê iunger verratten warst
- von deinen erweltê folck gefangen - vô falschê zewgê beschuldiget - vñ vô dreyê
richtern vngerechtigelich gericht in der erweltê statt zu osterlicher zeit - in der
pluenden zeit deines leibes ingent vnschuldigelich verurtailt - du warst vbergeben vnd
verspeyt - deines klaydes außgezogen fremde klaider angezogen - du warst auff den hals
geschlagen - dein augen und antlitz warden dir verspundê vnd mit bakenschlegen warst du
geschlagen - an die seul gepunden - gegaisselt - mit scharpffen dornen warst du gekront -
dein haubt mit rorê geschlagen vñ mit vnzellichen peinen warst du zerrissen - darumb
bitte ich dich lieber herr gibe mir vmb der gedechtnus willê dieser leydê vor meinê tod
ware rew - lawtere beicht vñ ein billige genngtuûg vñ ablassûg aller meiner sund amê
Gegruesset seist du aller suester Jhesu criste erbarm dich vber mich armen sunder Amen -
O Jesu criste ware freiheit der engel vnd ein paradiss der lustperkeit
gedêck der erschreckûg die du gelitten hast da alle dein feindt als die grawsamê leoben
vmb dich stunden vnd mit halsschlegen verspeyhûg vnd anderen vnerhoertê peinê dich
beschwert habê Ich bitt dich lieber herr Jesu criste durch alle scheltwort - hart schlege
- vnd birtere pein mit welchê dich al dein feind gepeiniget habê das du mich vô allê
meinê feindê sichtigê vnd vnsichtigê erloesest vñ gebest mir vnder dê schadten
deiner flugel selige beschutzung Amen -
Gegruessest seist du &c - Pater
noster - aue maria
O Jesu ein erschaffer vñ regierer der welt dê kein messunge nit ermessen
mag du beschleussest das ertreich mit einer hâd gedenck des bitterlichen schmertzens den
du gelitten hast do die vngetrewen Juden dein heillige hend an das creutz mit stumpffen
negeln zumoerstê angenagelet habê - vñ zu durchloecheren deine zarte fueß - da du
loecher des creutz nit erlangê mochtest nach irem willen haben sie deinen wunden
schmertzen vber schmertzen zu gefueget vñ also iemmerlich an dem creutz in die leng vñ
weit außgestrecket vnd zerzogen das alle geleich deiner glider verrencket wurde - Ich
bitt dich lieber herr Jhesu vmb die gedechtnus diser heiligen vñ bittern schmertze die du
an dê creutz gelittê hast das du mir gebest dein forcht vnd liebe Amen -
Gegruesset seist du &c - Pater
noster - aue maria -
O Jesu himlischer artzt gedenck des verlangês vñ schmerezê vñ des
neydes die du an dem galgê des heilligen creutzes erhebt in allen deinen glidern der
keins an seiner rechten stat bliben ist gelittê hast - also das kein schmertz deinem
schmertzen gleich erfunden nye wart - wañ von der solen der fueß auff die scheittel
deines haubt ist kein gesuntheit in dir nit gewesen - yedoch hast du vergessen aller
deiner schmertzem - vnd deinen hymelischen vatter fuer deine feind guetlich gebetten
sprechêde - Vater vergib in wañ sie wissen nit was sie thun - verleich mir lieber herr
Jesu durch dise libe barmhetzigkeit - vnd vmb gedechtnus willen diser schmertzen das die
gedechtnus deines bittern leydens sey ein volkumne vergebung aller meiner sunde Amen -
Gegruesset seist du &c - Pater
noster Aue Ma -
O Jesu ein spiegel der ewigen clarheit gedêck der betrubnus die du gehabt
hast da du in den spiegel deiner erlewchten maiestet gesehê hast dein zukunftig
außerwelten die durch verdienstnus deines heilligen leydens sollen sellig werden vñ die
straffung der boesen der ein grosse menig verdampt wirdt - ich bitt dich guetiger Jesu
durch die gruntlosen barmhertzigkeit mit welcher du als dê mit den verloren und
verzweifelten sundern mitleyden gehabt hast vnd sunder die du dê schacher an dê creutz
erzeigt hast sprechende - hewt wirstu mit mir sein in dê paradiss - das du mit mir
wirckest barmhertzigkeit in der stûdt meines todtes Amen -
Gegruessest seist du &c - Pater
noster - aue maria -
O Jesu ein lieplicher konig vñ allerbegirlichster gedenck der betrubnus
die du gehabt hast da du nackent vnd erbermlich an dê creutz hingest vnd dein frewnd vñ
bekantten entgegê bey dir stundê vnd fundest keinê der dich troestet allein dein liebe
gebererein die dir an deinê letztê zeittê in des todtes noetê getrewlichê beystund
welche du deinem iunger empfahlest sprechende - weib nym war dein sun - vñ zu dem iunger
- nym war dein mutter - Ich bit dich gutiger herr Jesu creste durch das schwert der
schmetzê das zu der zeit ir sel durch gieng das du mit mir mitleyden habest in allen
meinen leiplichen vnd gaistlichen betruebsalen - und peinen gibe mir troestung in aller
zeit meiner truebsal Amen -
Gegrusset seist du &c - Pater
noster aue maria -
O Jesu ein vnaußschopfflicher bruñ der gutigkeit der du auß innerlicher
begier y liebe an dê creutz gesprochê hast mich durst - das ist nach dem hayl des
menschlichen geschlechtz - wir bitten dich lieber herr das du entzundest vnser begier zu
allen volkumlichê wercken vnd dê durst der leiplichen begier vñ den hunger der
weltlichê wollust in vns gentzlich erkuele vnd außtilge Amen -
Gegruesset seist du &c - pater
noster - aue maria -
O Jesu ein suessigkeit der hertzê vnd ein senftigkeit des gemuetes - ich
bitt dich durch die bitterkeit des essigs vnd der gallen die du fuer vns an dem creutz vñ
in der stund deines tods gelitten hast vnd versucht hast verleich vns deinen heilligen
leichnâ vñ pluet zu aller Zeit wirdigelich zu empfahen zu einer hilff vnd trost vnser
selen Amen -
Gegruesset seist du &c - pater
noster - aue maria -
O Jesu ein konigliche tugent vnd frolockung gemuete gedêck der angst die du gelitten hast da du von bitterkeit wegê des todtes vnd grimmigkeit wegen der inden mit heller stuem dich vô got dê vater verlassen schreiest sprechêd mein got mein got wie hastu mich verlassen. Durch dise angst bitt ich dich lieber herr das du vns in den angsten vnseres tods nicht verlassest Amen - Gegrussest seist du &c - Pater noster - aue maria
O Jesu ein anfang vnd ende ein eynigûg vñ tugent - in allen mittel -
gedenck das du dich von der hoehe des haubtes bis auff die solê fueß fuer vns in das
wasser des leydens versencket hast - durch die weytte vnd groeß deiner wundê lerne mich
in rechter lieb zu halten dein gebott - Amen -
Gegrusset seistu &c - Pater
noster - Aue maria -
O Jesu ein thieffe der gruntlosen barmhertzigkeit ich bit dich durch die
tieffe deiner wundê die dein flaisch durchgâgê sein vñ das marck der gepein vnd deiner
in gewaide das du mich versenckten in den sunden senckest vnd verbergest in den lochern
deiner wnnden vor dem angesicht deines zornes als lang biß herr dein grim fuer geet -
Amen -
Gegruessest seist du &c - Pater
noster - Aue Ma -
O Jesu ein spiegel der Warheit ein zaichê der einigkeit vñ ein bant der
lieb gedenke der mennig deiner vnzelichê wundê mit welchen du vô der hoehe des haubtes
bis auff das vnderst deiner fuesse gewundet gewesen bist vnd von den boeßhaftigen iuden
zerrissen vnd mit deinem aller heilligstê pluet geroettet welche mennig der schmertzê du
in deinê iunckfrawlichê flaisch gelittê hast - O guettiger Jesu was solt du meer fuer
vns thun das du nit gethan hast ich bitt dich lieber herr Jesu das du schreibest all dein
wundê mit deinê aller edestê pluet in mein hertz das ich dariñ lesse deine schmertzê
vnd lieb da mit das ir gedechtnus alle zeit bey der heimlichkeit meines hertzen bleib also
das der schmertz deines leydens teglich in mir vernewet werdt vnd dein lieb gemeret so
lang das ich zu dir begertem schatz aller gutheit vnd frewden volkummen kûme - das du mir
Jhesu criste verleyhen wollest der du bist mein leben Amen -
Gegruesset seist du - &c - Pater
noster Aue Ma -
O Jesu allersterckster leobe vntoedlicher vñ vnwberwintlicher kunig
gedêck des schmertzens dê du gelitten hast do alle deine krefft deines leibs vñ deines
hertzê Kraftloß wurdest vñ do du mit genaigtê haubt sprachest - Es ist alles verbracht
- Durch die angst vnd deinê schmertzen erbarm dich mein in der letzten stundt des
außgangs meines lebens so mein sele geenst wurdt Amen -
Gegruesset seist du &c - pater
noster - aue maria -
O du eingeborner Jhesu des allerhoehstê vaters du schein vñ pildnis
seiner substanz gedenck deiner innigelichen befelnus mit welcher du deinem himlischen
vater deinê gaist befollen hast sprechende - Herre vater in dein hende befile ich meinê
gaist - vnd vmb vnserer erloesung willen hast du durch dein barmhetzigkeit mit zerrissem
leib vñ mit zerprochê hertzê mit lauttem geschray mit geoffentê ingewayd auff gebê
deinê gaist Durch disen alleredelstê tod bit ich dirch du konig der heiligen das du mich
bestettigest zu widerstehen dem teufel - dem flaisch vñ pluet das ich der welt gestorben
sey vnd dir allein lebe vñ in der letzten stund meines außgangs empfahe meynen wider zu
dir kummenden ellenden pilgramischen gaist Amen -
Gegruesset seist du - &c - pater
noster - aue maria -
O Jesu ein bruchtbarer vnd warer weinstock gedenck der vberflussigen vnd
vnmessunge deines plutes welches du vô deiner liebe als von einê gepresten weintrawbe
vberschwencklich vergossen hast do du an dê creutz die weinpresse selber getretten hast
vnd vns auß deiner heilligen seytten mit dem spere durchstochen pluet vnd wasser
geschenckt hast also das auch der minste tropff in dir nit blibê ist vnd darnach als ein
buechßlein auff in die hohe gehenckt bist also das dein zartes flaisch geschwelcket - die
fewchtigkeit deiner ingewaidt außgedorret vnd das marck aller deiner gepein verschwûdê
ist durch dises dein heiliges bitters leydê vnd vergiessung deines rosen farbê pluetes
bitte ich dich sueßer Jesu wundt mein hertz das mir die zeher der busse und der lieb
gleich sein tag vnd nacht vnd bekere mich gentzlich zu dir das dir mein hertz werd ein
ewige wonung vnd mein handelung sey dir ein wolgefallen vnd genem vñ das end meines
lebens loblich das ich nach dem ende disens lebens verdiene dich zu loben mit ellen
heiligen ewigelichen Amen -
Gegruesset seit du aller suester Jhesu crist erbarm dich vber mich armen sunder Amen - Pater noster - Aue Maria -
Tekst bez sredniowiecznych skrótów |
 |
Do spisu tresci / Zum Inhaltsverzeichnis / To the table of contents |
 |
|
 |
You can email me on
101.46506@germany.net
